„Sumir voru að gefa í skyn að af því að ég stamaði gæti ég ekki gengt þessu embætti. Ég skildi það aldrei alveg, hvort það snerist um að ég gæti ekki tjáð mig almennilega eða hvort stamið væri hluti af því hversu mikill fáviti ég væri,“ sagði Ásgeir Jónsson seðlabankastjóri í Síðdegisútvarpinu á Rás 2 í gær. Fjallað er um viðtalið á vef RÚV.
Í gær, 22. október, var dagur stams en deginum er meðal annars ætlað að vekja fólk til vitundar um stam, auka fræðslu og umræðu um það og áhrif þess á fólk.
Ásgeir stamaði sem barn en eftir þrotlausa þjálfun tókst honum að læra tækni sem gerði honum kleift að ráða betur við það. Í viðtalinu kom fram að hann ætti það enn til að stama en það gerðist helst ef hann væri þreyttur, stressaður eða illa fyrir kallaður. „Þá fer tæknin að brotna niður,“ sagði hann.
Ásgeiri var strítt þegar hann var barn og segir hann að fullorðnir hafi líka tekið þátt í stríðninni.
„Ég hef lent í því, sérstaklega þegar ég var að byrja ferilinn að eldri mönnum fannst þetta fyndið. Auðvitað situr þetta í manni.“
Í viðtalinu kom einnig fram að Ásgeir telji mikilvægt að börn sem stama í dag átti sig á að það er hægt að vinna bug á því og gera það viðráðanlegt. „Þú getur unnið á þessu og þú getur náð árangri í því sem þú vilt. Vonandi eru það þau skilaboð sem ég get sent.“
