Marentza Poulsen smurbrauðsdrottning Íslands og lífskúnster verður hjá Sjöfn Þórðar í þættinum Fasteignir og Heimili í kvöld sem tileinkaður er páskunum.
Það þarf vart að kynna Martentzu sem er landsþekkt fyrir sín girnilegu smurbrauð og kræsingar. Marentza rekur meðal annars Klambrar Bistro á Kjarvalsstöðum og Café Flóru í Grasagarðinum í Laugardalnum þar sem smurbrauðin hafa slegið í gegn ásamt öllum þeim kræsingum sem þar eru í boði.
Sjöfn heimsækir Marentzu heim í Skerjafjörðinn þar sem hún býr ásamt eiginmanni sínum í einstaklega fallegu húsi með sál. Þær ætla að ferðast stuttlega innanhúss, í eldhúsið þar sem Marentza nýtur sín allra best og í borðstofuna þar sem páskarnir fá njóta sköpunarhæfileika Marentzu.
Marentza hefur verið rómuð fyrir að framreiða ljúffeng og fagurlega skreytt smurbrauð, úr því allra ferskasta hráefni sem völ er á að hverju sinni, og sælkera kræsingarnar sem fanga bæði augað og bragðlaukana.
Í þættinum í kvöld mun Martentza sýna áhorfendum matarupplifun sína sem hún fékk í draumi á dögunum, smurbrauð sem eru tilvalinn til að njóta um páskana.
„Þessi smurbrauð ættu allir að geta gert, einfalt, fljótlegt og hægt að nýta afgangana af hátíðarmatnum í hráefnið,“ sagði Martentza og blómstrar í eldhúsinu. Sjöfn spjallar við Marentzu um matarvenjur, hefðir og siði sem tengjast páskunum, á bernskuárunum og fram til dagsins í dag.
„Páskarnir eru minn uppáhaldstími, birtan sem kemur með páskaskrautinu og gæðastundirnar með fjölskyldunni eru svo upplífgandi,“ sagði Marentza og smitar út frá sér með útgeislun sinni.
„Fjölskyldan og hefðir fjölskyldunnar hafa mikið gildi fyrir mig,“ segir Marentza og leggur mikla áherslu á að halda í hefðir og siði í takt við tíðarandann sem tengjast mat og samveru fjölskyldunnar en þessir páskar verða ólíkir öllum öðrum páskum sem hún hafi upplifað. Missið ekki af áhugaverðu og skemmtilegu páskainnliti til Marentzu í kvöld.
Þátturinn Fasteignir & Heimili, sem verður á dagskrá í kvöld klukkan 20.30 og aftur klukkan 22.30, er að jafnan ferskur, fjölbreyttur og með persónulegum blæ.