Davíð Helgason, einn af stofnendum hugbúnaðarfyrirtækisins Unity Software, hefur óskað eftir því við Seltjarnarnesbæ að fá að rífa niður einbýlishús að Steinavör 10 sem er í hans eigu.
Húsið er við hlið Hrólfsskálavör 2 á Seltjarnarnesi sem Davíð keypti af Arion banka en var áður í eigu Skúla Mogesen.
Davíð gekk frá kaupunum á Steinavör 10 fyrr á þessu ári en greint var frá kaupunum á vef Viðskiptablaðsins. Kom þar fram að lóðin væri fimm þúsund fermetrar og á henni stæði einbýlishús frá 1952.
Seltjarnarnesbær tók fyrir beiðni Kristjáns Arnars Kjartanssonar sem óskaði eftir leyfi til að rífa Steinavör 10 fyrir hönd Davíðs á fundi skipulags- og umferðarnefndar.
Um leið var óskað eftir stöðuleyfi vegna Yurt-tjalds og timburpalls á lóðinni sem húsið stendur á.
Kemur fram að skipulags- og umferðarnefnd bæjarins taki jákvætt í erindið en það þarf að sækja formlega um byggingarleyfi fyrir niðurrifi mannvirkja á þar til gerðu eyðublaði og skila inn til byggingarfulltrúa.
Davíð sem er annar Íslendinga á nýjasta lista Forbes yfir milljarðamæringa í heiminum keypti húsið við Hrófsskálavör 2 fyrir á sjötta hundrað milljón króna samkvæmt heimildum Fréttablaðsins.
Eignarhlutur Davíðs í Unity, sem er um fjögur prósent, var metinn á tvö hundruð milljarða króna þegar hann keypti Hrófsskálavör 2.