Fyrrverandi forseti Ungra jafnaðarmanna, Nikólína Hildur Sveinsdóttir Jensen, sagði frá því á Twitter í gær þegar hún var kynnt fyrir Bryndísi Schram, eiginkonu Jóns Baldvins Hannibalssonar, í boði fyrir nokkrum árum. Hún segir fyrstu kynni sín af Bryndísi ekki hafa verið sérstaklega góð.
Tístið hefur vakið mikla athygli, er komið með hátt í sex hundruð læk þegar þetta er skrifað og fengið umsagnir á borð við „tíst ársins“.
„Ég var kynnt fyrir Bryndísi Schram í einhverju boði fyrir nokkrum árum og hún æpti yfir sig „NiKKKóLíNa?? Hverjum DETTUR í hug að nefna barnið sitt það??”“ skrifar Nikólína á Twitter.
„Í stað að spyrja á móti hverjum dytti í hug að hylma yfir síendurtekin kynferðisbrot maka síns þá brosti ég bara vandræðalega,“ segir hún svo.
Tístið birtist í gærmorgun í kjölfar viðtals Fréttablaðsins við þrjár konur sem stigu fram undir nafni í fyrsta skipti og sögðu frá kynferði áreitni af hendi Jóns Baldvins.
Ég var kynnt fyrir Bryndísi Schram í einhverju boði fyrir nokkrum árum og hún æpti yfir sig „NiKKKóLíNa?? Hverjum DETTUR í hug að nefna barnið sitt það??” Í stað að spyrja á móti hverjum dytti í hug að hylma yfir síendurtekin kynferðisbrot maka síns þá brosti ég bara vandræðalega
— nikólína hildur (@hikolinanildur) January 16, 2021
