Óprúttinn innbrotsþjófur braust inn á bar í miðbæ Reykjavíkur á laugardagsmorgun. Samkvæmt heimildum Hringbrautar rændi þjófurinn engu nema hráefnum í einn kokteil.
Eftir því sem Hringbraut kemst næst fór þjófavarnarkerfi knæpunnar af stað um átta leytið á laugardagsmorgun. Þegar eigendur bar að garði hafði engu verið stolið nema hráefnum í Negroni kokteil.
Hringbraut er ekki kunnugt um eignaspjöll vegna þjófnaðarins. Einungis þrjú hráefni þarf í Negroni en það er gin, Campari, og Vermouth. Vínótek.is segir um að ræða einn einfaldasta kokteil í heimi, sem er ítalskur að uppruna.
Þjófurinn tók flösku af hverju. Inni á Vínótek.is er mælt með því að hræra hann. Setja gin, Campari og vermouth í viskýglas ásamt klaka. Hræra vel saman að því loknu og svo er hægt að skreyta með sneið af appelsínuberki.
Negroni – uppskrift
3 cl gin (London Dry Gin)
3 cl Campari
3 cl Vermouth Rosso