Óhætt er að segja að borgarfulltrúi Samfylkingarinnar, Sabine Leskopf, hafi orðið hvelft við þegar hún var úti að ganga með hundinn sinn í morgun.
Sabine, sem er fyrsti varaforseti borgarstjórnar, segir frá þessu í Facebook-hópi íbúa Langholtshverfis.
„Það er sérstakur staður í helvíti fyrir dýraníðinga. Og þá er ég að tala um aðila sem sprengdu flugelda með þvílíkum hvelli rétt í þessu nálægt Álfheimakjarnanum þegar ég labbaði fram hjá með hundinum mínum. Og ef það voru krakkar þá mega foreldrar þeirra gjarnan taka það til sín,“ segir hún.
Reglugerð um notkun skotelda er mjög skýr, en notkun þeirra er aðeins leyfð frá 28. desember til 6. janúar og alltaf bönnuð frá klukkan 22 á kvöldin til klukkan 10 á morgnana, að nýársnótt undanskilinni. Margir virðast eiga erfitt með að meðtaka þessar reglur.
Sabine segir í athugasemd undir þræðinum að sjálf trúi hún ekki á helvíti heldur hafi hún verið að tjá reiði sína vegna atviksins. Hún segist ekki vita hvort þeir sem sprengdu flugeldinn hafi ætlað sér að hræða hundinn, en viðbúið sé að fólki og dýrum bregði þegar flugeldar eru sprengdir á þessum stað um hábjartan dag.
„Hún varð fyrir ákveðnu ofbeldi og henni er nú held ég frekar sama hvort það var viljandi gert eða ekki. Og í þessum efnum þarf einfaldlega virkilega viðhorfsbreytingar, þannig að það má kannski alveg taka sterklega til orða af og til,“ segir hún og bætir við að fólk verði að gera sér grein fyrir afleiðingunum sem svona „saklaus skemmtun“ getur haft í för með sér.
