Bjarni Benediktsson, fjármálaráðherra og formaður Sjálfstæðisflokksins, segir að samskiptin við Davíð Oddsson, ritstjóra Morgunblaðsins og fyrrverandi formann Sjálfstæðisflokksins, séu ekki mikil sem sakir standa. Bjarni er í viðtali í nýjasta tölublaði Mannlífs þar sem hann ræðir þetta meðal annars.
Davíð, sem formaður Sjálfstæðisflokksins á árunum 1991 til 2005, hefur verið gagnrýninn á forystu Sjálfstæðisflokksins eins og hægt hefur verið að lesa úr ritstjórnargreinum á síðum Morgunblaðsins.
Bjarni virðist ekki taka þeirri gagnrýni persónulega þó hann viðurkenni að í blaðinu hafi verið áherslur sem hann finni ekki samleið með. Hann neitar því að það andi köldu á milli þeirra Davíðs.
„Ég upplifi það ekki þannig. Það eru einfaldlega ekki mikil samskipti eins og staðan er.“
Bjarni hefur setið á þingi síðan 2003 og verið formaður Sjálfstæðisflokksins síðan 2009. Hann er því öllu vanur og segist hafa lært ákveðna auðmýkt þegar kemur að gagnrýni.
„Maður lærir að bera virðingu fyrir ólíkum sjónarmiðum. Ég ætla ekki að segja að þetta sé alltaf auðvelt. En mótlætið styrkir mann. Með því að sigrast á erfiðleikum þá verður maður sterkari til þess að fást við enn erfiðari mál,“ segir hann í viðtalinu við Mannlíf.
