Birgitta Jeanne Sigursteinsdóttir, móðir Alexöndru Eldeyjar Finnbogadóttur, leggur til í hugmyndasöfnuninni Hverfið mitt hjá Reykjavíkurborg að byggður verði „Alexöndru róló“ í Vogabyggð.
Þetta kemur framí frétt Fréttablaðsins.
„Alexandra Eldey Finnbogadóttir (15.10.20-18.6.22) bjó í hinni nýju Vogabyggð mars 2022 - júní 2022. Ekkert leiksvæði er fyrir börn á þessu svæði svo við leggjum til að komið verði upp róluvelli í Vogabyggð í minningu hennar sem verður kallaður Alexöndruróló. Alexandra vildi hafa sem mest fjör og elskaði að róla og leika úti en við fórum yfirleitt langa leið til þess, alla leið yfir Sæbrautina á Drekarólóinn. Við vonum því að komið verði upp róló hér í Vogabyggð sem fyrst,“ segir á vef Reykjavíkurborgar en Fréttablaðið fékk leyfi frá Birgittu til að fjalla um hugmyndina.
Alexandra Eldey lést úr bráðri heilahimnubólgu á Spáni í sumar aðeins 20 mánaða gömul. Veikindi Alexöndru Eldeyjar fóru að gera vart við sig í fluginu rétt fyrir komu fjölskyldunnar til Madríd að kvöldi miðvikudagsins 15. júní.
Birgitta og Finnbogi Darri, faðir Alexöndru, fóru með hana á sjúkrahús beint eftir flugið og þar voru teknar prufur, gerðar ýmsar rannsóknir og henni gefin lyf.
Alexandra fór að hressast, var á batavegi og fengu þau leyfi til að fara með hana heim undir morgun. Að kvöldi næsta dags veiktist hún mjög hratt og fóru þau strax á sjúkrahúsið aftur, þaðan var hún flutt á háskólasjúkrahúsið í Madríd sem var betur til þess fallið að sinna veikindum hennar.
Alexandra Eldey hafði fengið allar ráðlagðar bólusetningar eins og önnur börn á Íslandi, þar með talið gegn pneumococcum. Læknar og hjúkrunarfræðingar gerðu allt sem í þeirra valdi stóð til að bjarga Alexöndru en það er lítið hægt að gera þegar þessi baktería nær fótfestu, jafnvel þó viðkomandi sé á sjúkrahúsi.
„Ótrúlega mikilvægt fyrir hverfisbraginn“
Samkvæmt ummælum undir tillögu Birgittu taka íbúar vel í hugmyndina.
„Það er ótrúlega mikilvægt fyrir hverfisbraginn að hafa róló. Vona að þetta verði að veruleika!“ skrifar Jessý Jónsdóttir undir tillöguna.
„Frábær hugmynd,“ bætir Grímur Jónsson við. „Falleg og góð hugmynd sem gagnast börnum og foreldrum í hverfinu, og heiðrar minningu elsku Alexöndru Eldeyjar á fallegan hátt. Vona að borgaryfirvöld bregðist við þessari hugmynd með opnum huga og kærleika,“ segir Oddný Elín Magnadóttir.
Íbúar í Reykjavík geta kosið með hugmyndinni hér.