„Ég var um daginn að reyna að rifja upp þau sjálfsvíg sem ég hef farið í vegna vinnunnar minnar. Ég komst að því að þau eru það mörg að ég gat ekki talið þau í huganum. Það er frekar sorgleg tilhugsun,“ segir Birgir Örn Guðjónsson lögreglumaður.
Birgir Örn, oft kallaður Biggi lögga, skrifar athyglisverðan pistil á Facebook þar sem hann vekur athygli á átaki Geðhjálpar um að geðheilsa verði sett í forgang innan heilbrigðiskerfisins og alls samfélagsins. Var vefurinn 39.is settur á laggirnar en talan vísar til fjölda þeirra sem sviptu sig lífi á síðasta ári og meðalfjölda þeirra sem svipta sig lífi árlega undanfarinn áratug.
Birgir Örn bendir á að sjálfsvíg séu nálægur og stór partur af samfélaginu og eitt af því sem gerir þau svo óhugnanleg sé hversu ráðþrota við virðumst vera gagnvart þeim. Svo virðist vera sem enginn árangur hafi náðst í baráttunni gegn þeim. „Þetta er nefnilega ekki eins og barátta gegn ákveðnum sjúkdómi eða slysum. Sjálfsvíg eru afleiðing. Afleiðing af lífinu sjálfu.“
Birgir Örn er þeirrar skoðunar að umræðan um sjálfsvíg sé bæði eðlileg og nauðsynleg og ekki megi loka augunum fyrir þeim eða líta á þau sem feimnismál – ekki frekar en krabbamein eða bílslys. Því miður sé ekki til nein töfralausn við því hvernig við fyrirbyggjum sjálfsvíg.
„Ástæður fyrir því að einhver ákveður að enda líf sitt geta verið svo endalaust margar. Sumir eiga við geðræn vandamál að stríða en alls ekki allir. Þetta getur líka verið uppgjöf, kvíði, hefnd, sorg, reiði, söknuður eða hvað sem er. Þetta er því ekki beint barátta gegn sjálfsvígum, heldur barátta gegn þeim atriðum sem geta leitt einstaklinga inn í þá hugsun að slíkt geti verið lausn. Þetta er barátta MEÐ bættu og geðheilbrigðara samfélagi.“
Birgir segir í pistli sínum að við getum aldrei borið ábyrgð á því að einhver annar sviptir sig lífi. Það eina sem við getum borið ábyrgð á eru okkar orð og athafnir.
„Við getum þannig öll haft áhrif á að einhverjum líði örlítið betur. Að einhver finni smá von. Að einhver sjái smá tilgang. Að einhver gefist kannski ekki upp. Að einhverjum renni reiðin. Að einhver leiti sér hjálpar. Það er partur af því að vera hluti af heild sem kallast fjölskylda, vinir, vinnustaður eða samfélag. Þar liggur okkar einstaklingsbundna ábyrgð. Það er alltaf önnur leið í boði en sjálfsvíg. Við höfum ekki það vald að velja þá leið fyrir aðra. Við höfum bara það vald að bjóða upp upp á hana. Kannski bara með einum örlitlum vegvísi,“ segir Birgir Örn.
Hann segir að lokum að kerfið sem heldur utan um okkur hafi þá skyldu og ábyrgð að setja geðheilsu á sama stall og líkamlega heilsu.
„Það að fólk hafi t.d. ekki efni á sálfræðiþjónustu eða annarri þjónustu sérfræðinga í geðheilbrigði er gjörsamlega galið. Við myndum aldrei sætta okkur við að fólk hefði ekki efni á að fara í botnlangatöku, hjartaþræðingu eða krabbameinsmeðferð og myndi þess vegna bara sleppa því og deyja. Það er kominn tími til að setja geðheilsuna í forgang. Það er lífs nauðsynlegt.“
Fólk með sjálfsvígshugsanir er minnt á Hjálparsíma Rauða krossins 1717 og netspjallið. Einnig er hægt að leita til Píeta samtakanna, síminn þar er opinn allan sólahringinn 552 2218 og vefsíðan www.pieta.is.