Bergþór Ólason, þingmaður Miðflokksins, fer ekki mjúkum höndum um Sigurborgu Ósk Haraldsdóttur, Formann skipulags- og samgönguráðs Reykjavíkur, í pistli í Morgunblaðinu í dag.
Pistillinn ber heitið Freka konan og Borgarlínan og lýsir Bergþór því í pistlinum hvernig „freka konan“ vilji þrengja að fjölskyldubílnum og þvinga borgarbúa inn í Borgarlínuna.
Öllu fórnað fyrir einkabílinn
Sigurborg skrifaði í gær pistil undir yfirskriftinni Einkabíllinn er ekki framtíðin þar sem hún sagði áratugi frekra karla sem vildu fórna öllu fyrir einkabílinn væru liðnir.
„Formaður skipulags- og samgönguráðs má eiga það að hún hefur viðurkennt og að því er virðist beinlínis hreykt sér af því að ætla að þvinga íbúa höfuðborgarsvæðisins í Borgarlínuna,“ skrifar Bergþór og segir það vera gert með því að tryggja færri bílaakreinar og bílastæði.
Fordæmalaus frekja og yfirgangur
„Það er ólíklegt að viðlíka frekja og yfirgangur hafi viðgengist á fyrri stigum hvað skipulagsmál höfuðborgarinnar varðar. Öll meðul virðast leyfileg, þegar kemur að því að þrengja að fjölskyldubílnum,“ ítrekar Bergþór.
Þá virðist hann sannfærður um að borgarbúar hafi engan áhuga á Borgarlínunni. „Vilji og val borgarbúa virðist ekki skipta borgarfulltrúann nokkru máli. Samfélagsverkfræðin er allsráðandi og trúin á Borgarlínuna virðist trompa öll rök og raunar alla tengingu við raunveruleikann.“
Ekki tekið mark á almenningi
Lítil virðing formanns skipulags- og samgönguráðs endurspeglast í fjölmörgum málum að mati Bergþórs. „Grensásvegurinn var þrengdur, Hofsvallagata var þrengd, strætóstoppistöð komið fyrir á miðri Geirsgötu, Hagatorg er ekki lengur hringtorg, battavöllur fellur af himnum ofan og svona mætti áfram telja. Framgangan gagnvart flugvellinum í Vatnsmýrinni er síðan kapítuli út af fyrir sig.“
Ekkert mark sé tekið á íbúum sem kvarta yfir því að ekkert mark sé tekið á umkvörtunum þeirra eða ábendingum.
Lítil varadekk ráða ferðinni
„Núverandi meirihluti Samfylkingarinnar í Reykjavík, með öllum sínum varadekkjum, virðist ætla að setja undir sig hausinn og þvinga íbúa höfuðborgarinnar inn í svokallaða Borgarlínu.“
Þetta gerist að sögn Bergþórs í boði Viðreisnar. „Sem tók að sér að vera nýjasta varadekkið undir vagni borgarstjóra.“
„Lítil veikluleg varadekk sem ætluð eru til þess eins að koma bifreið á næsta dekkjaverkstæði ganga undir ákveðnu nafni. Það kemur á óvart að flokkur Benedikts Jóhannessonar taki að sér að vera í því hlutverki.“