„Við sem höldum með Íslandi eigum að geta gert það án þess að allt þetta bull fylgi með. Saga Íslands snýst ekki um stöðuga varnarbaráttu gegn erlendri ásælni,“ segir Guðmundur Andri Thorsson, þingmaður Samfylkingarinnar.
Guðmundur gerir þar að umtalsefni nýja auglýsingu frá KSÍ sem var frumsýnd í gær og tákn íslensku landsliðanna, eða eins og segir á heimasíðu KSÍ:
„Síðasta aldarfjórðung hefur tákn landsliðanna verið samsett úr upphafsstöfum KSÍ, fótbolta og íslenska fánanum. Merkið hefur bæði staðið fyrir ímynd sambandsins og landslið Íslands. Eftir því sem starfsemi sambandsins hefur þróast, ímynd Íslands vaxið og árangur landsliðanna aukist, hefur merkið átt erfiðara með að standa undir þessu tvískipta hlutverki. Þörf hefur skapast fyrir merki sem fangar betur grunngildi og uppsprettu liðsandans; ástríðufullt sameiningartákn sem laðar fram styrkleika okkar, sögu og baráttuanda.“
Í auglýsingunni og nýja merkinu er áhersla lögð á landvættirnar fjórar; griðungur, gammur, dreki og bergrisi sem sagðar eru hinar fullkomnu táknmyndir fyrir landslið Íslands. „Þær eru tákn samstöðu og verja vígið okkar sem önnur lið óttast, heimavöllinn. Baráttuandinn, viljinn og þrautseigjan eru alltumlykjandi.“
Auglýsingin og merki landsliðanna hefur vakið töluverða athygli og sitt sýnist hverjum. Guðmundur Andri er einn þeirra sem gagnrýnir hana og segir:
„Mér finnst nú heldur mikið í lagt í nýju KSÍ-auglýsingunni að láta líf þjóðarinnar í þúsund ár snúast um að verjast grimmum innrásarherjum, og nota til þess heilaspunann úr Snorra Sturlusyni um ófreskjur sem magnaðar voru að hans sögn upp gegn útsendara Haraldar Gormssonar, og urðu svo löngu síðar að táknmyndum landsfjórðunganna undir heitinu „landvættir“. Þetta er í grundvallaratriðum röng sýn. Og það er slæmt að ýta undir hana,“ segir hann og bætir við að saga sýni að á öllum tímum sé einangrun slæm. Forsenda gróandi þjóðlífs séu viðskipti og samskipti við erlendar þjóðir.
Illugi Jökulsson gerir þetta einnig að umtalsefni á Facebook-síðu sinni og segir einfaldlega: „Eru þau algjörlega hrokkin upp af standinum þarna hjá KSÍ? Þetta er það hallærislegasta, klikkaðasta og vitlausasta sem ég hef lengi séð! Eða er þetta kannski outtake úr myndinni hans Will Ferrell þar sem hann var að gera grín að okkur?“
Eins og áður segir eru skiptar skoðanir og telja margir að auglýsingin og merkið sé vel heppnað. „Mér finnst þetta reyndar algjörlega brilliant. Blessunarlega er misjafn mannanna smekkur,“ segir til að mynda einn. Auglýsinguna má sjá hér að neðan:
