Ásmundur Friðriksson, þingmaður Sjálfstæðisflokksins, kallar eftir sögum fólks sem glímir við ókleif skuldafjöll vegna margföldunar smálána sem bjóðast á Íslandi.
Ásmundur skrifaði færslu um þetta á Facebook í gær þar sem hann vakti athygli á máli einstaklings sem farið hefur illa út úr smálánum.
„Smálán geta farið með líf fólks. Ég þekki dæmi þess að á nokkrum vikum, mesta lagi mánuðum fer fjárhagur fólks úr því að vera þungur í það að verða óviðráðanlegur. Baggi sem fer með og tekur líf fólks,“ segir Ásmundur.
Einstaklingurinn sem Ásmundur aðstoðar tók rúmar 200 þúsund krónur í ellefu lánum, eða 20 þúsund krónur í hvert sinn.
„Í dag, 6 mánuðum síðar stendur skuldin í 615.000 krónum. Þessu til viðbótar er viðkomandi með um 200.000 kr. hjá öðru smálánafyrirtæki. Núna 6 mánuðum síðar skuldar viðkomandi 803.000 krónur. Skuld sem er útilokað að hann geti greitt.“
Ásmundur kallar eftir því að fólk sem glímir við samskonar vanda setji sig í samband. Vill hann láta reyna á það hvort þetta fólk eigi virkilega engan rétt.
Hann segir að einstaklingum sem enga möguleika hafa á að greiða aftur þessi lán vegna lágra tekna sé samt lánað og lánað þangað til allt er komið í skrúfuna og rúmlega það.
„Lánafyrirtækin hafa beinan aðgang að launareikningum viðkomandi í bönkum og í hvert sinn sem einhver peningur kemur inn standa smálánafyrirtækin vaktina og taka út allt sem inni er fyrir skuldum viðkomandi. Langar að fá skilaboð á messenger um þá sem vilja deila með mér stöðunni en ég hyggst skoða þessi mál gagnvart lánafyrirtækjunum. Látum reyna á hvort þetta fólk eigi virkilega engan rétt.“
Í samtali við DV í gær sagðist Ásmundur þekkja nokkur dæmi um einstaklinga sem farið hafa illa út úr smálánum.
„Þetta eru oft okkar minnstu bræður og systur. Ég þekki raunar dæmi um par sem fékk lán hátt í milljón hjá banka þar sem annað þeirra var greiðandi en hitt ábyrgðarmaður. Hvorugt hafði þroska til að leggja mat á viðskiptin en lánið var veitt og svo fór það sína hefðbundnu innheimtuleið.“
Hann sagði að einstaklingurinn sem hann aðstoðar nú hafi ekki þroska til að meta afleiðingar lántöku.
„Hann missti sig í jólamánuðinum, langaði að kaupa jólagjafir handa mömmu sinni, bróður sínum og frændsystkinum. Svo hefur hann undirgengist að þessi fyrirtæki hafi aðgang að launareikningnum hans! Nokkuð sem mér fyndist að ætti ekki að vera hægt. Þetta er flottur strákur sem vinnur með sínum sjúkdómi en þessi lán eru orðin að fjalli sem hann ræður ekki við,“ sagði hann við fréttavef DV.
Smálán geta farið með líf fólks. Ég þekki dæmi þess að á nokkrum vikum, mesta lagi mánuðum fer fjárhagur fólks úr því að...
Posted by Ásmundur Friðriksson on Sunnudagur, 5. júlí 2020