„Nú legg ég til, að íslensku sjónvarpsstöðvarnar sýni myndir af skelfilegum þjáningum sjúklinga, sem hafa orðið veikir af Covid 19 veirunni. Það er nóg af slíkum myndskeiðum á erlendum sjónvarpsstöðvum,“ segir Árni Gunnarsson, fyrrverandi fréttamaður og þingmaður.
Árni skrifar pistil á Facebook-síðu sína sem hefur vakið nokkra athygli en yfirskrift pistilsins er DAUÐANS ALVARA. Hann hvetur unga fólkið til að huga betur að sér.
„Síðan mætti skjóta inn myndum af nýjum grafreitum, t.d. í Bandaríkjunum og Brasilíu, þar sem liggja hundruð og þúsunda einstaklinga, sem látist hafa úr veirunni. - Hópar Íslendinga, einkum yngra fólk, tekur lítið eða ekkert mark á þeirri dauðans alvöru, sem er fylgifiskur smits.“
Árni segir að unga fólkið verði að fá að horfast í augu við afleiðingar plágunnar og oft á tíðum heimskulegs framferðis, ekki bara gagnvart sjálfum sér, heldur einnig samborgaranna.
„Stjórnvöld eiga ekki að hika við, að beita hörðustu aðgerðum gegn veirunni, jafnvel þótt það kosti einhver fjárhagsleg áföll. Hér er um líf og dauða að tefla og nánast ógjörlegt að fara milliveg til að sætta einhverja hagsmunahópa. Lífið er dýrmætara en allt annað, jafnvel peningar. Þeirra má afla á nýjan leik. Hins vegar verður plágunni ekki snúið við, nema með sameiginlegu átaki og skynsamlegum lífsháttum,“ segir Árni.
