„Þetta var örugglega erfiðasta ákvörðun sem ég hef tekið um ævina,“ segir Sigurborg Ósk Haraldsdóttir, borgarfulltrúi Pírata, sem hyggst hætta í borgarstjórn vegna veikinda. Hún fær hvergi frið, ekki einu sinni í sturtu í Vesturbæjarlaug, að því er fram kemur í helgarviðtali Fréttablaðsins.
Þar greinir Sigurborg frá því að hún undirgangist nú gigtarrannsóknir. Hún og fjölskyldan ætla að flytjast til Húsavíkur. Sigurborg segir aðstæður í stjórnmálum gríðarlega erfið, sérstaklega fyrir konur.
„Ég skipulagði mig þannig að ég skrifaði greinar og birti hluti á meðan ég var í veikindaleyfi. Ég vildi ekki að fólk héldi að ég væri í veikindaleyfi og gerði allt til að fela það. Ég vildi sýnast vera nógu sterk,“ segir Sigurborg í samtali við Fréttablaðið.
Þar lýsir hún því hvernig hún hafi upplifað veikindin. Í eitt skiptið hafi maðurinn hennar komið heim eftir að hafa dvalið annarsstaðar í sóttkví.
„Þegar hann kom til baka, heim úr sóttkvínni, sá hann að ég var bara ekki sama manneskjan lengur. Þá var ég búin að vera ein heima með strákana í þessu og skreið bara á milli rúmsins og borðsins og gerði ekkert annað. Það er ótrúlegt hvað maður getur pínt sig lengi.“
Þá lýsir hún því meðal annars hvernig hún hafi orðið fyrir aðkasti víða vegna vinnu sinnar. „Það er baunað yfir mig þegar ég er í sturtu í Vesturbæjarlauginni, þegar ég er að taka leigubíl eða hvað sem er, það bara stoppar ekkert.“
Helgarviðtal Fréttablaðsins við Sigurborgu.