Þó að smitum hafi fækkað töluvert hér á landi að undanförnu er faraldurinn ekki búinn. Þetta segir Anna Sigrún Baldursdóttir, aðstoðarmaður forstjóra Landspítalans, í samtali við Morgunblaðið í dag.
Rúmir tíu dagar eru síðan fleiri en fimm smit greindust á einum sólarhring og á fimmtudag greindist ekki eitt einasta smit. Þrátt fyrir það eru nítján manns á sjúkrahúsi með veiruna.
„Það er miður að fólk sé svo veikt að það þurfi innlögn hjá okkur. Skilaboðin eru klárlega að þetta er ekki búið,“ segir Anna Sigrún við Morgunblaðið og bætir við að í vikunni hafi sex einstaklingar verið lagðir inn vegna COVID-19 og eru fimm á spítalanum núna. Hinir sem liggja inni eru ekki með virkt smit og glíma einhverjir þeirra við eftirköst veirunnar.
„Þetta er fólk á miðjum aldri og eldra. Það er svolítið síðan við vorum með fimm sjúklinga með virkt smit,“ segir hún við Morgunblaðið í dag.