„Við sjáum að margir pósta myndum af sigrum þegar þeir ná á fjallstind með því að lyfta glasi. Það eru ótal myndir úti um allt þar sem fólk fagnar sigrum með áfengi. Með þessu er búið að tengja áfengisneyslu við heilbrigðisviðburði, sem orkar vægast sagt mjög tvímælis.“
Þetta segir Anna Hildur Guðmundsdóttir, formaður SÁÁ, í mjög svo athyglisverðu viðtali í Fréttablaðinu í dag. Þar er fjallað um áfengisneyslu eldri borgara hér á landi en af innlagnartölum á Vogi má sjá tæpa tvöföldun í dagdrykkju 61 árs og eldri sem leita sér aðstoðar á tíu árum. Árið 2011 sögðust um 5% drekka hvern dag en í fyrra var hlutfallið 9%.
Í viðtalinu segir Anna Hildur að áfengi sé alltumlykjandi í þjóðfélaginu. Neysla þess sé í raun upphafin við öll tækifæri á sama tíma og æ fleiri miðaldra Íslendingar og eldri borgarar ánetjist áfengisfíkn með ömurlegum afleiðingum.
Í fréttinni bendir Anna Hildur á að fólk á vinnumarkaðsaldri njóti aðhalds af vinnunni; þetta fólk þurfi gjarnan að vakna snemma og vera í sæmilegu standi. Við starfslok geti skapast hætta hjá þeim sem áttu í vanda með áfengi en náðu að stemma sig af vinnunnar vegna.
„Þá hverfa oft ýmsar skyldur og hömluleysið tekur við. Áfengisneyslan fer úr böndunum og afleiðingarnar geta orðið hrikalegar,“ segir hún.
Á sama tíma og ágætur árangur virðist hafa náðst varðandi áfengisneyslu ungmenna þykir þróunin í efri aldurshópum varhugaverð.
„En það er hálfgert tabú að ræða þessi mál. Ein ástæðan er þessi rosalega áfengisdýrkun í samfélagi sem stundum virðist hreinlega gegnsósa af áfengi,“ segir hún.
