„Tíu þúsund manns sem eru hér í ár er jafn mikil viðvera og 500.000 ferðamenn sem dvelja í viku,“ segir Andri Snær Magnason, rithöfundur og fyrrverandi forsetaframbjóðandi, í athyglisverðum pistli á Facebook-síðu sinni.
Þar skrifar hann um opnun og lokun landsins á tímum COVID-19 faraldursins en sitt sýnist hverjum í þeim efnum. Andri Snær segir að við séum engu að síður stödd í veruleika þar sem öllum leikreglum hefur verið breytt og því lífi sem við höfum vanist hafi verið umturnað.
„Draumurinn um ,,eðlileg samskipti" við útlönd og viðhalda gamla módelinu um okkar eigin helgarferðir virðist ekki ganga upp. Zoomveiruveruleikinn án faðmlaga, leikhúss og kvikmyndasýninga, án listahátíða, fótboltaleikja, jarðarfara, ferminga, menntaskóla er glataður. Núna er staðan sú að uppi eru allt aðrar þarfir í heiminum og þar af leiðandi allt önnur tækifæri,“ segir Andri sem varpar svo fram hugmynd sinni.
„Frekar en að stefna að hundrað þúsund manns sem koma í vikudvöl væri áhugavert að sjá hvort einhverjar þúsundir væru til í að dvelja til lengri eða skemmri tíma og taka vinnuna með sér. Það mætti jafnvel rigga upp alþjóðlegum skóla, eflaust eru milljón kennarar sem þrá að hitta nemendur augliti til auglits á ný.“
Hann segir að tugmilljónir einstaklinga beggja vegna atlantsála geti vart hugsað sér að fara í gegnum skólalausan vetur með innilokuð börn og alla vinnuna á bakinu.
„Sumir munu hreinlega bugast andlega og því væri veirufrítt land hrein lífsbjörg fyrir marga. Tíu daga eða tveggja vikna sóttkví myndi spilla hefðbundnum vikuferðum en myndi engu skipta fyrir fólk sem kæmi til lengri dvalar. Þetta gæti orðið afar áhugaverður veruleiki og eflaust yrðu til óteljandi óvænt tengsl, sambönd og tækifæri sem væru langtum mikilvægari en að streitast við að halda í gamla módelið.“
Andri Snær deildi frétt Stöðvar 2 frá því júlímánuði um bandarískan forstjóra sem flutti til Íslands með fjölskyldu sína.
„Mér var boðið að vinna með sprotafyrirtækjum í frumkvöðlasetri á Íslandi. Þegar ég fékk boðið var ekki spurning fyrir mig að koma hingað með fjölskylduna. Hér er hægt að lifa eðlilegu lífi á öruggan máta,“ sagði forstjórinn, Kevin Laws, í fréttum Stöðvar 2.
Andri Snær segir að þetta þurfi ekki að vera auðmenn. „Ég hitti konu um daginn sem flutti fjölskylduna hingað frá Bandaríkjunum af sömu ástæðu, venjulegt fólk sem tekur starfið með sér,“ segir hann.
Hugmynd hans hefur fengið góðar undirtektir og leggur sjónvarpsmaðurinn Egill Helgason orð í belg.
„Hægt að leggja það þannig upp, en líka þannig að við gætum flutt inn fólk sem eflir hér þekkingarstig, verkkunnáttu, kemur með ný tækifæri og atvinnugreinar. Fæstar þjóðir slá hendinni á móti slíku. Mun heldur ekki af veita þegar ferðamennska hrynur – með alla sína spurn eftir erlendu láglaunafólki – og stóriðjufyrirtæki leggja upp laupana.“