Alþingi hefur birt endurútreikninga á aksturskostnaði Alþingismanna sem leiðir það í ljós að ökuþórinn Ásmundur Friðriksson, þingmaður Sjálfstæðisflokksins, er sá þingmaður sem eyddi mest í akstur árið 2020. Kjarninn greindi fyrst frá.
Áður höfðu fréttamiðlar greint frá því að Guðjón S. Brjánsson, þingmaður Samfylkingarinnar, væri sá þingmaður sem hefði velt Ásmundi úr sessi.
Það voru hins vegar mistök hjá skrifstofu Alþingis sem fólust í því að þegar bílaleigubíll sem tekin hafði verið á leigu fyrir Guðjón fyrir rúmum þremur árum var gerður upp þá reyndist hann hafa ekið aðeins meira á ári en gert hafði verið ráð fyrir í langtímaleigusamningnum. Við það myndaðist viðbótarkostnaður vegna áranna 2018, 2019 og 2020 upp á um eina milljón króna. Þau mistök voru hins vegar gerð af skrifstofu Alþingis að sá kostnaður var allur gjaldfærður á árinu 2020, þegar hann hefði átt að dreifast yfir árin 2018 og 2019 líka.
Fyrir vikið lækkaði aksturkostnaður Guðjóns um rúmar 600 þúsund krónur og niður í tæpar 2 milljónir króna. Akstur Ásmundar kostaði rúmar 2,2 milljónir króna og endurheimti hann þar með titilinn sem margir héldu að hann hefði glatað.
