Íslensk erfðagreining stendur nú fyrir skimun á Akranesi í dag vegna COVID-19 en um 500 manns voru boðaðir í skimun þar sem valið var með slembiúrtaki.
Að því er kemur fram í færslu Almannavarna um málið hafa íbúar sýnt góð viðbrögð við boði Íslenskrar erfðagreiningar en bæjarstjóri Akraness, Sævar Freyr Þráinsson, greindi frá því á Facebook í gær að flest plássin sem voru í boði hafi fyllst strax og því hafi einhverjir fengið meldingu um að fullt væri í skimun.
Þá vísar Sævar til tölvupósts frá Íslenskri erfðagreiningu þar sem fram kom að 448 tímar sem voru í boði hafi fyllst fljótt en að margir hafi ekki átt að lenda í því að fá meldingu um að allt væri fullt.
„Við munum bæta við nokkrum tímum til að hægt sé að bóka og komast að. Ráðum við 500 og getum því aðeins aukið. Ætluðum að eiga nokkur pláss inni ef eitthvað kæmi upp á,“ segir enn fremur í svari Íslenskrar erfðagreiningu, að sögn Sævars.