Frá og með 1. október næstkomandi verður póstnúmerið 102 tekið upp fyrir Vatnsmýri. Þá mun sá hluti póstnúmers 101 sem er sunnan Hringbrautar breytast í póstnúmerið 102. Mörk fyrir póstnúmer 105 og 107 haldast óbreytt. Íbúar í Skerjafirði eru ósáttir við ákvörðunina.
Í tilkynningu frá Íslandspósti segir að póstnúmerið 102 sé tekið upp að frumkvæði Reykjavíkurborgar sem óskaði þess fyrr á árinu að það yrði tekið upp á viðkomandi svæði þar sem á sér stað mikil uppbygging um þessar mundir. Í upphafi þessa árs samþykkti borgarráð tillögu þess efnis.
„Reykjavíkurborg óskaði eftir því að við myndum taka upp póstnúmerið 102 fyrr á árinu en stórt og mikið hverfi er í uppbyggingu á því svæði sem um ræðir. Við töldum mjög mikilvægt að bregðast við þessari beiðni frá borginni. Einhverrar óánægju hefur gætt meðal íbúa á þessu svæði vegna breytingarinnar en ég vil taka það fram að breytingar á póstnúmerum hafa almennt ekki áhrif á viðskiptavini þegar kemur að dreifingu pakka og bréfa,“ segir Hörður Jónsson, framkvæmdastjóri rekstrarsviðs Póstsins.
Ósætti meðal íbúa í Skerjafirði
Óánægjunnar sem Hörður vísar til hefur gætt hjá íbúum í Skerjafirði. Breytingin þýðir að íbúar á svæðinu munu frá og með 1. október búa í póstnúmeri 102 í stað 101. Auk þess munu bæði Háskóli Íslands og Háskóli Reykjavíkur tilheyra póstnúmeri 102.
„Íbúar hverfisins hafa verið hlunnfarnir. Það hefur komið í ljós að íbúar hverfisins kæra sig ekki um að skipta um póstnúmerr“, sagði Árdís Pétursdóttir, einn stjórnarmanna Prýðifélagsins Skjaldar - íbúasamtaka í Skerjafirði, í samtali við Morgunblaðið í sumar.
Sagði hún að íbúar Skerjafjarðar séu margir mótfallnir þessari tillögu, sér í lagi vegna þess hve hverfisvitundin í Skerjafirði sé sterk. Árdís bætti því við að borgaryfirvöld hafi beðið Prýðifélagið um umsögn um málið, hvar Prýðifélagið hreyfði mótmælum, en aldrei hafi verið haft samband við félagið aftur eftir það.
Þegar breytingin fer í gegn í byrjun næsta mánaðar verða á sama tíma gerðar nokkrar breytingar á landsbyggðinni, en helsti tilgangur þeirra er að afmarka sveitarfélög með sérstökum póstnúmerum og einfalda þannig flokkun og dreifingu. Þá verða einnig gerðar nokkrar minniháttar breytingar í póstnúmerum á höfuðborgarsvæðinu.