„Þessir tveir fávitar fóru á kostum við ströndina áðan. Hentust út úr bílnum á sundskýlum, stungu sér út í og klifruðu upp á ísmolann sem rak uppávið í aðfallinu.“
Þetta segir Adólf Ingi Erlingsson, fyrrverandi íþróttafréttamaður, á Facebook-síðunni Bakland Ferðaþjónustunnar. Þar má sjá tvo unga menn, sem stungu sér til sunds og klifruðu upp á ísjaka. Átti atvikið sér stað skammt fyrir neðan Jökulsárlón. Myndskeið Adólfs hefur vakið mikla athygli.
Sumir hrósa ungu mönnunum á meðan öðrum finnst þeir hafa stefnt lífi sínu í voða. Þannig segir Katharina: „Þarna er greinilega fólk á ferðinni sem hefur ekki mikilla menntun um ofkælingu. Gæti sloppið, en þarf ekki endilega. Þeir hafa greinilega gaman að þessu”.
Þessu svarar Davíð Geir: „Það er alveg til fólk sem þolir það að synda í köldu vatni í korter.“
Þá segir Símon Adrian Aðalsteinsson:
„Gaman sem breytist hratt í fokdýrt margra milljóna krónu útkall ef eitthvað kemur fyrir.“
Þá segir Ómar Þór Sigvaldason:
„Af hverju eru þeir fávitar? Eru þetta ekki bara ævintýra menn að leika sér?“
Dæmi nú hver fyrir sig en hér fyrir neðan má sjá þetta magnaða myndskeið: