Sveinn Andri Sveinsson, lögmaður, lætur sér fátt um finnast um orð Birgis Þórarinssonar, þingmanns Miðflokksins, um kristni og kristinfræði. Hann svarar Birgi í Facebook færslu þar sem hann segir trúna vera dóttur fávísinnar.
Tilefnið eru fréttir af nýársræðu þingmanns Miðflokksins, þar sem hann sagði meðal annars að taka þyrfti upp kristinfræði að nýju í grunnskólum. Þá sagðist hann vilja sporna gegn afkristnun og að mikilvægt væri að kvótaflóttamenn sem kæmu til Íslands væru kristnir.
Sveinn lætur sér fátt um finnast:
„Trúin er dóttir fávísinnar. Það er skóla að uppfræða en ekki að viðhalda fáfræði.“
Hann segir að trúarbrögð gætu komið við sögu í skólastarfi sem hluti af kennslu í mannfræði, sögu og félagsfræði.
„Trúarbrögð gætu komið við sögu í skólastarfi sem hluti af kennslu í mannfræði, sögu og félagsfræði þar sem nemendur eru upplýstir um öll þau stríð á milli trúarbragða sem mannkynssagan geymir og hvernig trúin hefur verið frá upphafi nýtt til þess að stjórna samfélögum fólks og veita einföld svör við flóknum spurningum. Spurningum sem vísindin hafa síðar meir svarað.“