„Margir hafa undrast hve ógnartök Sjálfstæðisflokksins hafa lítið linast á samfélaginu þótt fylgið virðist vera komið í um fimmtung kjósenda. Þegar þetta er skoðað betur sést að þetta er ekkert skrýtið. Ofurríkir Íslendingar eiga mestallar eignir í landinu.“
Þetta segir fjölmiðlamaðurinn Sigurður G. Tómasson á Facebook. Sigurður heldur fram að Sjálfstæðisflokkurinn sé eins og trúarstofnun sem gætir hagsmuna trúbræðra og raði sínu fólki inn í allar eftirlitsstofnanir, banka og dómstóla. Þá taki flokkurinn hart á þeim safnaðarmeðlimum sem gangi úr flokknum.
„Meira en 99% þeirra eru fylgismenn og félagar í gamla alræðisflokknum. Lífeyrissjóðirnir eiga mest af hlutafé og þeim er stjórnað af frjálshyggjufólki mestan part,“ segir Sigurður og bætir við að frjálshyggjan sé trúarbrögð. Hann bætir við:
„Með áratuga löngum tökum hefur Sjálfstæðisflokkurinn raðað inn dyggum trúbræðrum sínum í allar eftirlitsstofnanir, banka, fjármálastofnanir og dómstóla. Sjálfstæðisflokkurinn hefur alla tíð tekið hart á undanvillingum og gerir enn. Flokkurinn er trúarstofnun sem gætir hagsmuna trúbræðranna.“