Sigmundur hættir í stjórnmálum og nýtt líf kviknar hjá bjarna ben

Nýtt ár og ný tækifæri árið 2020. Hringbraut hafði samband við spákonuna Ellý Ármanns sem leit til gamans í tarotspil sín fyrir nokkra þjóðþekkta Íslendinga.

Bubbi Morthens

„Bubbi birtist hér hermaður í fremstu víglínu. Hann veit aldrei hvenær hann þarf að flýja en er stöðugt undir það búinn. Hann beinir hér orku sinni í farvegi sem færa honum hamingju. Lungun og taugakerfið leita eftir meira ljósi hjá Bubba og hugleiðsla kemur sér vel, það veit hann eflaust,“ segir hún.

Ellý segir Bubba verða á stöðugum hlaupum árið 2020 en að hann líti aldrei um öxl heldur alltaf fram á við.

„Bubbi er fyrirtaks hlustandi, en láttu það ekki plata þig því hann hlustar bara til að geta gripið fram í og koma sínu smáræði inn í samræðurnar. Hann er hvatvís ræðumaður og hefur skoðanir á öllu. Rödd hans er sterk og hann hefur áhrif.“

Útvarpsstjóri

„Svanhildur Hólm er næsti útvarpsstjóri. Hún er bjartsýn og treystir á að örlögin útvegi henni þau tæki og tól sem hún þarf fyrir framhaldið. Hún er ein af þessum sterku íslensku konum sem ber ábyrgð á eigin láni því hún kann lagið á öllu. Hún getur til að mynda breytt kofa í ástarhreiður og slæmum bylgjum í góðar,“ segir Ellý.

Ellý segir tengsl Svanhildar við listir, hugvísindi og ásýnd hluta vera sterk og að árið 2020 verði hún upptekin.

„Einkum í huganum og á öllum sviðum samskipta. Hún verður árásargjörn þegar líða tekur á árið en hún býr yfir hernaðaranda sem hún heldur í skefjum og gefur ekki lausan taum nema við vissar aðstæður. Þessi kona ryður úr vegi óyfirstíganlegum hindrunum ef um er að ræða málstað sem hún trúir ár.“