Bandarískur ferðamaður strunsaði út úr Hallgrímskirkju í gær. Hann var ósáttur eftir að hafa gengið fram á regnbogafána sem blasti við söfnuðinum á kórtöppum kirkjunnar. Starði hann á fánann í nokkra stund og rauk svo út úr kirkjunni og fram í Guðbrandsstofu. Þar hitti hann kirkjuvörð. Mbl.is vekur athygli á þessu en samtal ferðamannsins og kirkjuvarðarins var á þessa leið:
„Afsakið, er þetta regnbogafáni í kirkjunni?“ mun ferðamaðurinn hafa spurt og játti kirkjuvörðurinn því.
„Hvers vegna myndi kirkja hafa svona lagað?“ spurði hann í kjölfarið og fékk þau svör varðarins að ást guðs væri fyrir allt fólk, burtséð frá kynhneigð þess eða bakgrunni.
„Jesús myndi aldrei samþykkja það,“ fullyrti sá bandaríski þá. „Jú, það myndi hann gera,“ svaraði kirkjuvörðurinn en uppskar þvert nei ferðamannsins.
„Ég er hræddur um að við munum þurfa að vera ósammála um það,“ sagði kirkjuvörðurinn og reyndi þannig að leysa úr deilunni.
„Þetta er ekki kristin kirkja!“ svaraði Bandaríkjamaðurinn, bætti við að þetta væri hneisa og strunsaði með það út.
Á síðu kirkjunnar er þess að lokum getið að hún standi með fjölbreytileika og litríki lífsins.
