Heimiliskettirnir tveir að Ólafstúni 14, sem varð fyrir snjóflóðinu sem féll á þriðjudagskvöld, eru báðir komnir í öruggt skjól eigendum þeirra til mikils léttis.
Alma Sóley Ericsdóttir Wolf, unglingsstúlkan sem lenti undir snjóflóðinu, sagðist í viðtali við RÚV hafa haft minnstar áhyggjur af sjálfri sér en meiri áhyggjur af fjölskyldu sinni og köttunum tveim enda eru þeir fjölskyldunni mjög kærir.
Svaf vært úti í horni
Eyþór Jóvinsson, björgunarsveitarmaður og eigandi bókabúðarinnar á Flateyri sagði í samtali við mbl.is að kettirnir hefðu sést á hlaupum stuttu eftir flóðið en síðan hafi ekkert sést til þeirra fyrr en annar kötturinn fannst daginn eftir.
„Svo er ég að fara aftur inn í húsið í gær og fer inn í barnaherbergi og þar sefur hann bara vært úti í horni, allur hinn rólegasti. Hann var ekki fastur, honum hefur einhvern veginn tekist að flýja út í flóðinu og svo hefur hann bara leitað aftur heim í gamla rúmið sitt. Það björguðust allir, bæði mannfólk og ferfætlingar,“ sagði Eyþór við mbl.is.
