Landvernd leggst eindregið gegn því að ný orkuver eða miðlunarlón verði heimiluð innan fyrirhugaðs þjóðgarðs

Landvernd leggst eindregið gegn því að ný orkuver eða miðlunarlón verði heimiluð innan fyrirhugaðs þjóðgarðs

Stjórn Landverndar hefur sent inn umsagnir um drög að frumvörpum umhverfisráðherra um Hálendisþjóðgarð og Þjóðgarðastofnun. Stjórnin er hliðholl báðum frumvörpum og telur að þau geti styrkt stöðu náttúruverndar í landinu og aukið velsæld víða um land.

En stjórnin gerir einnig veigamikla fyrirvara við fyrirliggjandi drög og sem hún vonar að verðir teknir til greina áður en málið verður lagt fyrir Alþingi. Meðal annars legst Landvernd eindregið gegn því að ný orkuver eða miðlunarlón verði heimiluð innan þjóðgarðs enda er það ekki í samræmi við náttúruverndarlög eða alþjóðlegar skilgreiningar á þjóðgörðum. Þá bendir Landvernd á að stjórnfyrirkomulag Þjóðgarðastofnunar og Hálendisþjóðgarðs sé of flókið í fyrirliggjandi drögum og  sveitastjórnir fái óeðlilega mikil yfirráð yfir þeim á kostnað fagfólks.

Þá legst Landvernd eindregið gegn breytingum á 47. gr. náttúruverndarlaga sem eru inn í frumvarpi um Þjóðgarðastofnun þar sem þær munu veikja þá vernd sem þjóðgarðar veita íslenskri náttúru og eru ekki í samræmi við alþjóðleg viðmið.

Stjórn Landverndar telur að markmið þjóðgarðs eiga alltaf fyrst og fremst að vera verndun landslags, víðerna, náttúru- og menningarminja og endurheimt raskaðra vistkerfa. En einnig nýting þessa verðmæta náttúruarfs með sjálfbærum hætti. Landvernd segir að það eigi að hafa sjálfbærni að leiðarljósi við hefðbundna nýtingu, eins og veiðar og sauðfjárbeit, innan þjóðarðs á miðhálendinu. Þá vill stjórn Landverndar minna á að þær rannsóknir sem gerðar hafa verið benda til þess að fjárhagslegur ávinningur sveitarfélaga af friðlýstum svæðum sé verulegur og þau sveitarfélög sem í dag njóta góðs af starfsemi þjóðgarða eru almennt mjög ánægð með samstarfið og því sem það hefur skilað nálægðum byggðum.

Nýjast