Í nótt klukkan 4:31 varð jarðskjálfti sem var 3,5 að stærð nálægt Grindavík. Þetta kemur fram í tilkynningu frá Veðurstofu Íslands. Skjálftinn varð 1,9 km norðan af Grindavík og Veðurstofunni bárust tilkynningar um að fólk hefði orðið vart við skjálftann. Nokkrir eftirskjálftar hafa fylgt í kjölfarið og kl. 4:59 varð jarðskjálfti sem var 3,2 að stærð.
Bjarki Friis, náttúruvársérfræðingur á Veðurstofu Íslands, segir í samtali við mbl.is að ljóst sé að virknin sé meiri í dag en í gær.
„Þessir skjálftar eru rétt norður af Grindavík, á milli Þorbjörns og bæjarins.“
Búast má við áframhaldandi virkni á svæðinu.
Hann segir að engin gosvirkni sé sjáanleg en áfram verði fylgst grannt með. Nýjum mælum til vöktunar var komið fyrir í gær. Búast má við áframhaldandi jarðskjálftavirkni á svæðinu. Næsti samráðsfundur vísindamanna verður haldinn á morgun.