Jarðskjálfti af stærðinni 3,4 varð klukkan 6:06 í morgun um 3 km norðaustan við Grindavík. Jarðskjálftanum hafa fylgt nokkrir minni eftirskjálftar, sem allir voru undir 1,9 að stærð. Enginn órói sést á mælum að sögn Veðurstofunnar.
Veðurstofan segir jarðskjálfta algenga á þessu svæði. Tilkynningar hafa þegar borist stofnuninni um að skjálftinn hafi fundist í byggð.
Skjálftinn varð á landi á um þriggja kílómetra dýpi. Sigríður Magnea Óskarsdóttir, sérfræðingur á skjálftasviði Veðurstofunnar, segir í samtali við Mbl.is að ómögulegt sé að áætla hvort fleiri stórir skjálftar muni fylgja í kjölfarið.
„Þetta er þó þekkt sprungusvæði,“ segir hún og bætir við að Veðurstofan muni fylgjast vel með þróun mála.