Hildur Guðnadóttir tónskáld vann í kvöld Grammy-verðlaun fyrir tónlist sína sem hún samdi fyrir sjónvarpsþáttaröðina Chernobyl. Hildur var tilnefnd fyrir bestu tónlist í sjónrænum miðlum. Fyrr á árinu hlaut Hildur sín fyrstu Emmy verðlaun fyrir sömu þætti.
Þættirnir fjalla um kjarnorkuslysið sem varð í Úkraínu árið 1986. Hildur vann með hljóð sem hún tók upp í yfirgefnu kjarnorkuveri í Litháen.
Hildur hefur unnið hver verðlaunin á fætur öðrum og tónlist hennar farið sigurför um heiminn. Hildur er tilnefnd til Óskarsverðlauna og þykir afar sigurstrangleg en hún hefur hlotið einróma lof fyrir tónlist sína í kvikmyndinni Joker sem fjallar um erkióvin leðurblökumannsins.