Á Akranesi er heillandi staður sem allir verða að heimsækja, Matarbúr Kaju. Matarbúr Kaju er allt í senn, heildsala, verslun og lífrænt kaffihús sem hefur að geyma margar þær bestu kökur og kræsingar sem finnast hér á landi. Karen Jónsdóttir, sem er að öllu jöfnu kölluð Kaja, er konan á bak við þetta allt saman. Hennar regla er einföld þegar kemur að vöruvali. „Allar vörur eru lífrænar, umhverfisvænar og gæðin í hámarki,“ segir Kaja og trúir því staðfastlega að við séum það sem við borðum og með þann boðskap að leiðarljósi stofnaði hún Kaja Organic, Matarbúr Kaju og Café Kaju sem blómstrar á Skaganum og gleður líkama og sál. Nýjasta viðbótin á Café Kaju er Heiti súkkulaðibarinn. Sjöfn Þórðar heimsækir Kaju á Heita súkkulaðibarinn og fær Kaju til að laga sín uppáhalds heitu súkkulaði sem eiga það öll sameiginlegt að vera gerð úr lífrænum hágæðahráefnum. „Mitt uppáhalds í dag er heitt súkkulaði með heslihnetuolíunni, bragðið er ómótstæðilegt,“ segir Kaja og nýtur sín til fulls á súkkulaðibarnum. Meira um heita súkkulaðibarinn og upplifun Sjafnar í þættinum í kvöld.
Þátturinn Fasteignir & Heimili verður á dagskrá í kvöld klukkan 20.30 og aftur klukkan 22.30 og jafnan ferskur, fjölbreyttur og með persónulegum blæ.
