Tímamótum fylgja oft breytingar og hvort þær séu af hinu góða eða slæma er vandi að spá. Líklegt þykir þó að fáir taki hækkandi verðlagi fagnandi. Með nýju ári koma í einhverjum tilfellum nýir verðmiðar en svo virðist sem árið 2020 verði ívið dýrara en árið á undan.
Einkabíllinn dýrari í rekstri
Eldsneytisgjöld hafa áhrif á líf flestra Íslendinga daglega og mega landsmenn búast við hærra gjaldi nú en fyrir áramót. Bensíngjöld hækkuðu um 1,85 krónur á lítra og olíugjald hækkaði úr 62,85 krónur í 64,40 krónur á lítra.
Kolefnisgjald hækkar um tíu prósent á lítrann bæði hvað varðar bensín og olíu.
Bifreiðagjöld hækkuðu um 2,5 prósent á nýja árinu og Úrvinnslugjald á ökutæki hækkaði úr 350 krónum í 900 krónur.
Sektir hækka
Umferðasektir hækka einnig svo um munar og munu þau sem fremja umferðarbrot þurfa að greiða fyrir það dýrum dómum. Sekt fyrir að keyra gegn rauðu ljósi hækkaði um 20 þúsund eða úr 30 þúsund krónum í 50 þúsund krónur.
Þá var hámarkssekt fyrir ölvunarakstur hækkuð úr 210 þúsundum yfir í 270 þúsund.
Vöruhækkanir
Mjólkurvörur hækka um 2,5 prósent og fór lágmarkslítra verð á mjólk til bænda úr 90,48 krónum í 92, 74 krónur.
Áfengis- og tóbaksgjald hækkaði um 2,5 prósent.
Ríkið rukkar meira
Nefskattur Ríkisútvarpsins hækkar úr 17.500 í 17.900.
Leikskólagjöld hjá Reykjavíkurborg hækkuðu um 2,5 prósent.
Strætó hækkaði fargjöld um 2,3 prósent, og er stakt fargjald á 480 krónur.
Stakt gjald í sund hækkaði úr 1.000 krónum í 1.030 krónur. Fjallað var um ofangreindar gjaldskrárhækkanir í helgarblaði DV.