Guðmundur Kristjánsson, forstjóri Brims, segir að nafni sinn Guðmundur J. Guðmundsson, jafnan nefndur Gvendur jaki, einn helsti verkalýðsforingi síðustu aldar, hafi verið besti vinur unglinganna á Rifi. „Hann setti yfirvinnubann á lestun skipa í Reykjavík þannig að á föstudagskvöldum fóru skipin frá Reykjavík og Rif var fyrsta höfnin þannig að þá fengum við alltaf vinnu allar helgar allan veturinn og fengum vel greitt fyrir enda á yfirvinnutaxta allan tímann,“ segir Guðmundur í viðtalinu við Jón G.
UM SÖLU GILDIS LÍFEYRISSJÓÐS Á HLUTNUM Í BRIMI TIL SKAGFIRÐINGA
Þegar Guðmundur er spurður að því hvers vegna hann hafi ekki keypt eignarhlut Gildis lífeyrissjóðs í Brimi fyrr á þessu ári, svarar hann því til að hann hafi einfaldlega ekki vitað að til stæði að selja þennan hlut . „Við vissum ekki að Gildi ætlaði að selja. Í minni einföldu trú hélt ég að lífeyrissjóðirnir væru langtímafjárfestar.“
Þessi viðskipti urðu mjög sérstakur kapall því Gildi lífeyrissjóður seldi Fisk Seafood hlutinn og fékk greitt með eignarhlut Skagfirðinga í Högum. Fisk bætti nokkrum dögum síðar við sig hlut í Brimi og komst upp í 10% eignarhlut sem Guðmundur keypti síðan. Fisk Seafood, sem er í eigu Kaupfélags Skagfirðinga, hagnaðist um rúman 1 milljarð á þessu viðskiptum.