Bergur Þór Ingólfsson leikari og leikstjóri er umfjöllunarefni í ritstjórnarpistli Týs í Viðskiptablaðinu sem kom út í dag, en Týr er dulnefni og því ekki vitað hver skrifar. Þar er því haldið fram að leiksýningin Svartlyng sem Bergur leikstýrði hafi fengið litla aðsókn á sama tíma og sýningin hafi ítrekað verið auglýst í Fréttablaðinu. Í umfjöllun Hlínar Agnarsdóttur segir um verkið:
„Svartlyng er pólitísk ádeila sem er skrifað beint inn í íslenskan samtíma. Ádeilan beinist fyrst og fremst gegn valdamesta stjórnmálaflokki á Íslandi, Sjálfstæðisflokknum. Spjótin beinast gegn ráðherrum hans og embættismönnum.“
Í verkinu bregða leikarar sér í búning Bjarna Benediktssonar og þá er Hönnu Birna Kristjánsdóttur og Sigríði Andersen blandað saman í eina persónu.
Bergur er einnig gagnrýndur fyrir uppsetningu á samtölum Klaustursþingmanna í Borgarleikhúsinu. Í Viðskiptablaðinu segir: „Bergur Þór Ingólfsson leikstjóri reiddi hátt til höggs með leiklestri í beinni útsendingu á meiðandi svívirðingum af Klausturbar síðasta vetur. Úr varð skammarlegt klámhögg, sem særði helst þá er síst skyldi. Borgarleikhúsið á enn eftir að upplýsa útsvarsgreiðendur í Reykjavík um hvað það kostaði. Það er gott að hafa allan kostnað borgarbúa við flokkspólitískan áróður uppi á borðum.“
Þá snýr Týr sér að Svartlyngi sem Bergur leikstýrði og sýnt var í Tjarnarbíói síðasta vetur. Týr segir:
„Svartlyng var kynnt sem „gamanleikur“ á vegum leikfélagsins Grals, en var í flesta staði vandræðaleg samkoma fyrir tómlegum sal í Tjarnarbíói þá daga sem verkið var sett upp. Kannski spillti mest fyrir hve flokkspólitískt erindið var augljóst, en leikurinn var skrifaður upp eftir forsögn Bergs Þórs.“
Í verkinu er ekki aðeins Sjálfstæðisflokkurinn harðlegar gagnrýndur, verkið fjallar einnig öðrum þræði um það þegar kynferðisbrotamaðurinn Robert Downey fékk uppreist æru á síðasta ári. Robert var stjörnulögfræðingur og var hann fastagestur á síðum fjölmiðla. Hann var framkvæmdastjóri Helgarpóstsins sáluga og aðaleigandi Skjás eins um tíma og einnig tengdur Sjálfstæðisflokknum. Robert misnotaði unglingsstúlkur og þóttist vera 17 ára gamall piltur. Í fórum hans fannst svo minnisbók sem innihélt 335 kvenmannsnöfn með bæði símanúmerum og póstföngum. Við nöfnin höfðu verið skráðar tölur sem líklegt er að hafi vísað til aldurs stúlknanna. Týr segir í Viðskiptablaðinu:
„Það sem vakti hins vegar fyrst og fremst athygli Týs varðandi þessar sýningar var ótrúlegur fjöldi heilsíðuauglýsinga í Fréttablaðinu. Svartlyng var auglýst 26 sinnum með heilsíðu litauglýsingum í Fréttablaðinu liðinn vetur. Að auki birtust 14 minni auglýsingar í sama blaði. Þá fór fram kostuð herferð á Facebook í janúar.“
Þá er gefið í skin að sýningin hafi að einhverju leyti verið kostuð af almannafé. Vill pistlahöfundurinn Týr að styrkir vegna verksins verði gefnir upp. Týr segir:
„Þá kemur sér vel að Bergur Þór hefur kynnt sig til leiks í þjóðfélagsumræðunni sem mikinn málsvara upplýsinga um hvaðeina. Þess er því skammt að bíða að allar upplýsingar um tekjur, opinbera styrki og gjöld vegna Svartlyngs verði birtar opinberlega. Eiginlega hljóta það að vera einfeldningsleg mistök að leyndarhyggjunni um þetta hafi ekki verið aflétt nú þegar.“
Guðmundur Brynjólfsson höfundur verksins, sem hlaut mikið lof gagnrýnenda, tjáir sig um pistilinn í Viðskiptablaðinu. Guðmundur segir:
„Salurinn var ekki tómlegri en það að verkið var tekið aftur til sýninga á vormisseri Tjarnarbíós. En þegar menn ljúga til um smáatriði eins og aðsókn að leiksýningu þá getur fólk rétt ímyndað sér hvort sömu menn ljúga ekki meira þegar stærri mál liggja við. Því miður er ástandið þannig að mögulegt er að skrifa Svartlyng II. [...] Þá vil ég taka fram að ég hef aldrei skrifað að \"fyrirmælum\" eins eða neins. Hvorki Bergs Þórs Ingólfssonar né annarra. En auðvitað er það ofarlega í huga allra leigupenna að menn skrifi samkvæmt fyrirmælum. Mér ofbjóða svona skítlegar dylgjur.“
Þá segir Nína Rún Bergsdóttir, ein stúlknanna sem steig fram og greindi frá því að Robert Downey væri barnaníðingur:
„Ég veit nú fyrir víst að pabbi minn er ekki hræddur að leggja allt fram á borðið og hefur ekkert að fela... annað en þessi \"Týr\"“
Á Facebook-síðu Bergs eru pistillinn í Viðskiptablaðinu harðlega gagnrýndur. Þar segir Þórarinn Leifsson rithöfundur: „Ótrúlegur rógur. Man varla eftir öðru eins“ Þá segir gagnrýnandinn Páll Baldvin: „Hvaða drullusokkur og nafnleysingi situr í skjóli og ber mönnum á brýn eitt og annað. Það á ekki að svara svona vesalingum sem eru ekki menn til standa fyrir málstað sínum.“