Eyþór Arnalds, fjárfestir, tónlistarmaður og oddviti þeirra Sjálfstæðismanna í borginni og Ástríður Jósefína Ólafsdóttir myndlistarkona eru par. Frá þessu er greint á vef Smartlands. Eyþór og Ástríður búa saman í Vesturbæ Reykjavíkur. Í samtali við Hringbraut sagði Eyþór að tíðindin væru rétt.
Eyþór sló fyrst í gegn sem tónlistarmaður en helti sér síðan út í viðskipti og stjórnmál. Ástríður er alin upp á Ítalíu og þykir afar efnilegur myndlistarmaður.
Í samtali við Mannlíf á síðasta ári greindi Eyþór frá því að hann væri skilinn á borði og sæng við þáverandi eiginkonu sína.
„Ég á fjögur börn á aldrinum tíu til átján ára og þau hafa alveg fengið að vera í friði,“ segir hann. „Ég vona að samfélagið virði einkalíf fólks og þá sérstaklega barna. Ég er mjög stoltur af börnunum mínum og finnst þeim ganga mjög vel í því sem þau eru að gera. Við konan mín erum skilin að borði og sæng þannig að þetta starf mitt hefur lítið bitnað á heimilislífinu. Það er sama hvert maður fer, það er alltaf einhver sem vill ræða málin við mann og maður verður að svara hverju sem er, hvenær sem er, hvar sem er.“
Í samtali við Hringbraut staðfesti Eyþór að hann og Ástríður væru par. Eyþór sagði. Hann hefði ekki ætlað sér að auglýsa það sérstaklega en slíkt fréttist. Nokkur aldursmunur er á parinu en Eyþór vildi lítið láta hafa eftir sér um hið nýja samband, nema þetta og það var stutt:
„Ástin sigrar.“