Fyrirlesarinn Alda Karen Hjaltalín vakti mikla athygli á árinu og kom það því fáum á óvart að hún hafi verið tekin fyrir í Áramótaskaupinu. Dóra Jóhannsdóttir fór með hlutverk Öldu með glæsibrag þar sem hún kyssti peninga, heimilistæki, bíla og fleira til að öðlast það endurgjaldslaust.
„Áratugamarkmiðið mitt er að komast út í geim,“ sagði Alda Karen á fyrsta degi ársins á Instagram. „Nú þarf ég bara að finna geimfara með frunsu og njálg til að kela við.“
Mælir með að nota smá tungu
Í atriði Skaupsins um Öldu Karenu sést hinn umræddi fyrirlestur Þú ert nóg fyrir fullum sal í Hörpu. Eða líkt og segir í skaupinu „hvernig eigi að hætta að eiga glatað líf.“
Þar ráðleggur Alda áhorfendum að kyssa þá hluti sem þau girnast, sjálf hafi hún hlotið allar þær vörur og peninga sem varir hennar hafi snert. Hún mælir þar næst með að nota smá tungu ef fólk er virkilega spennt fyrir að öðlast vörurnar sem fyrst.
Njálgur og frunsa skárri en fátækt
Einhverjir áhorfendur virðast þó hafa áhyggjur af smithættu og sýklavörnum en Alda gefur lítið fyrir það. „Hvort myndir þú frekar vilja vera fátækur eða eiga skítnóg af pening og þurfa þá kannski að vera með smá frunsu og njálg.“
Áhrifavaldurinn virðist þó ekki hafa tekið gríninu alvarlega, þvert á móti þakkaði hún fyrir útreiðina á samfélagsmiðlum. „Takk fyrir mig Skaup og gleðilegt ár allir!“