Víðir Reynisson, yfirlögregluþjónn almannavarnasviðs ríkislögreglustjóra, segir hópsýkingu á leikskólanum Jörfa boða fleiri smit næstu daga. Í dag greindust þrettán manns með Covid-19 innanlands þar af voru aðeins fimm í sóttkví.
Þau smituðu sem voru í sóttkví hafi þó verið þar svo stutt að allir sem þau hafa umgengist síðustu daga eru útsettir fyrir smiti.
„Það eru nánast allir þessir þrettán utan sóttkvíar má segja,“ útskýrði Víðir í samtali við Fréttablaðið. „Sá sem var styðst í sóttkví var bara búin að vera í klukkutíma.“
Breska afbrigðið á ferðinni
Tíu smitanna tengjast leikskólanum Jörfa þar sem breska afbrigði veirunnar greindist meðal starfsmanna. Smitið er talið hafa komið til landsins um mánaðarmótin með einstaklingi sem ekki virti sóttkví eftir landamæraskimun.
„Það er aðili sem við eftirlit virtist ekki hafa virt sóttkví og lögregla hafði afskipti af honum. Við erum svo með raðgreiningu, sem tengir þetta saman,“ sagði Víðir í samtali við mbl.is.
Hærri tölur væntanlegar
Víðir sagði hópsýkinguna kristallast í kringum leikskólann Jörfa þar sem 130 manns, þar af 33 starfsmenn og hundrað börn, eru öll komin í sóttkví og verða skimuð í dag.
„Við erum ekki komin með niðurstöður frá öllum starfsmönnum leikskólans,“ segir Víðir. Það sé því verulega líklegt að fjöldi smita muni hækka næstu daga. „Miðað við þann fjölda barna og fullorðna sem fer í skimun í dag þá kæmi mér verulega á óvart ef við fengjum ekki dálítið af tölum í dag.“