Þrettán þingmenn úr röðum Miðflokksins og Sjálfstæðisflokksins hafa lagt fram þingsályktunartillögu um „óréttmæti málshöfðunar Alþingis gegn ráðherrum og afsökunarbeiðni“ vegna landsdómsálsins svokallaða.
Landsdómsmálið vakti gríðarlega athygli á sínum tíma en þá var Geir H. Haarde, fyrrverandi forsætisráðherra, ákærður vegna starfa sinna fyrir hrunið. Alþingi samþykkti sömuleiðis að höfða mál gegn Ingibjörgu Sólrúnu Gísladóttur, fyrrverandi utanríkisráðherra, Árna Mathiesen, fyrrverandi fjármálaráðherra, og Björgvin G. Sigurðssyni, fyrrverandi viðskiptaráðherra, en þau voru ekki ákærð.
Tillagan hefur verið lögð fram í tvígang en er nú endurflutt með minniháttar breytingum.
„Með tillögunni er lagt til að Alþingi álykti að rangt hafi verið að leggja til málshöfðun á hendur ráðherrum vegna pólitískra aðgerða eða aðgerðaleysis, sbr. tillögu til þingsályktunar á 138. löggjafarþingi (þskj. 1502, 706. mál), að ranglega hafi verið staðið að atkvæðagreiðslu um tillöguna og að rangt hafi verið að samþykkja hana. Alþingi álykti enn fremur að þeir fyrrverandi ráðherrar sem upphaflega þingsályktunartillagan beindist gegn, og sá ráðherra sem loks var ákveðið að höfða mál gegn, sbr. þingsályktun nr. 30/138, verðskuldi afsökunarbeiðni frá hlutaðeigandi aðilum.“
Þingmennirnir sem standa að baki tillögunni eru eftirtaldir: Sigmundur Davíð Gunnlaugsson, Anna Kolbrún Árnadóttir, Bergþór Ólason, Birgir Þórarinsson, Gunnar Bragi Sveinsson, Karl Gauti Hjaltason, Ólafur Ísleifsson, Sigurður Páll Jónsson, Þorsteinn Sæmundsson, Óli Björn Kárason, Páll Magnússon, Ásmundur Friðriksson og Brynjar Níelsson.
Hér má lesa tillöguna í heild sinni.