Miðflokkurinn hefur lagt fram frumvarp þar sem heimilað verður að sekta atvinnurekendur sem vísvitandi eða af stórfelldu gáleysi greiða lægri laun en kveðið hefur verið á um. Birgir Þórarinsson er fyrsti flutningsmaður frumvarpsins.
Í frumvarpinu er einnig kveðið á um að atvinnurekendum verði skylt að afhenda stéttarfélögum og trúnaðarmönnum á vinnustað gögn um kjör launafólks.
Í tilkynningu frá flokknum segir að bæði atvinnurekendur og fulltrúar launafólks hafi kallað eftir breytingunum.
Efling hefur sett svokallaðan launaþjófnað á oddinn nú í haust og hafa nokkrar deilur verið um hvort það sé rétta úrræðið. Samkvæmt kjaramálasviði Eflingar, sem telur um 27 þúsund félagsmenn, hefur kröfum fjölgað úr 200 á ári upp í 700 á síðustu fimm árum. Þá hafi heildarupphæðin hækkað mikið og hafi numið 345 milljónum króna á síðasta ári.
