Vilhjálmur Árnason, þingmaður Sjálfstæðisflokksins, skýtur á bólakaf hugmyndir þess efnis að hækka álögur á sykraðar vörur.
Morgunblaðið greindi frá því í dag að starfshópur sem heilbrigðisráðherra skipaði hafi nú skilað tillögum sínum. Verði farið eftir þeim munu sætindi og sykraðar vörur hækka um 20% í verði. Meðal þess sem hópurinn leggur til er að vörugjöld verði lögð á gos- og svaladrykki, íþrótta- og orkudrykki sem innihalda sítrónusýru, sælgæti, kex, kökur, sætabrauð og orku- og próteinstykki.
Vilhjálmur gefur lítið fyrir þessar hugmyndir og segir óskiljanlegt hvernig hópur fólks getur horft svona þröngt á mál og komist að sameiginlegri niðurstöðu um gagnslausar og hættulegar tillögur.
Vilhjálmur tekur saman nokkra punkta og nefnir að menning og hefðir skipti mestu máli í heilbrigðara mataræði. Spyr hann hvort sú þróun hafi ekki einmitt verið í rétta átt að undanförnu án sykurskatts.
„Forvarnir og fræðsla standa alltaf best fyrir sínu, breytum þannig m.a. menningunni,“ segir hann og bætir við að jákvæðir hvatar og betra aðgengi að heilsunni sé líklegra til árangurs en boð bönn og hærri álögur.
„Ég veit ekki betur en að allar sjoppur og bensínstöðvar hafi sætindi að meirihluta í vöruúrvali sínu og gangi bara vel þrátt fyrir um 100% meiri álagningu en í stórmörkuðunum. Hverju mun þá 20% hækkun breyta? Á svo bara að setja skattinn á þar sem er augljóslega eru sætindi í innihaldinu en ekki í mjólkinni þar sem fólk á síður von á háu sykurmagni? Þetta gengur ekki!“