Vilhjálmur Birgisson, formaður Verkalýðsfélags Akraness, segir ekki annað hægt en að hafa verulegar áhyggjur þegar stjórnarsáttmálinn er lesinn. Vilhjálmur lýsir þessu í færslu á Facebook-síðu sinni.
Eins og kunnugt er var hnausþykkur stjórnarsáttmáli Sjálfstæðisflokks, VG og Framsóknar undirritaður í gær og er þar víða komið við. Vilhjálmi lýst ekki á blikuna og nefnir sérstaklega eitt máli sínu til stuðnings.
„Þessar áhyggjur mínar byggjast á því að undir kafanum um vinnumarkaðsmál er talað um að efla valdheimildir ríkissáttasemjara,“ segir Vilhjálmur og bætir við að það liggi fyrir að hans mati að þessar auknu valdheimildir byggist á því að ríkissáttasemjari hafi völd til að fresta og takmarka verkföll launafólks.
„Allir á íslenskum vinnumarkaði vita að verkfallsréttur launafólks er einn lang mikilvægasti réttur sem launafólk hefur og þann rétt má ekki undir nokkrum kringumstæðum skerða eða takmarka.“
Vilhjálmur segir að það hafi verið blautur draumur stjórnvalda og vissra stjórnmálamanna að rýra og veikja þennan mikilvæga rétt launafólks til að knýja í gegn réttlátar og sanngjarnar kröfur sínar.
„Þessar auknu valdheimildir ríkissáttasemjara er einn liður í því að færa vinnumarkaðinn í átt að svokölluðu Salek þar sem samningsréttur launafólks er skertur og takmarkaður.
Það er afar mikilvægt að launafólk og verkalýðshreyfing standi fast í fæturna og beiti afli sínu að stöðva þessa fyrirætlan stjórnvalda.“
Vilhjálmur bendir á að einnig sé kveðið á um að leikreglur vinnumarkaðar verði skýrðar með nýjum starfskjaralögum. Rifjar hann upp að nokkur stéttarfélög hafi náð að stoppa af frumvarp á síðsta þingi sem hefði skaðað launafólk ef umrætt frumvarp hefði náð að verða að lögum.
„Þetta þekkja formenn VR og Eflingar vel enda létu það vinna fyrir sig lögfræðilegt álit þar sem það kom fram að þessi lög væru ef eitthvað væri skaðleg fyrir launafólk.
Síðan er fleira þarna sem mér hugnast ekki eins og að lögfesta 15,5% iðgjöld í lífeyrissjóðina, enda ekkert tekið á því að launafólk fái aukið vald til að ráðstafa stærri hluta af 15,5% í frjálsan séreignasparnað.“
Vilhjálmur spyr síðan hvar loforðið sé um að stíga skerf fyrir afnámi verðtryggingar sem búið var að lofa verkalýðshreyfingunni og/eða taka húsnæðisliðinn úr vísitölunni? Ekkert sé að finna um þetta í stjórnarsáttmálanum.
„Hvar er kosningaloforðið sem skilaði Framsókn þúsundum atkvæða en Framsókn lofaði að ríkið styðji við frístundir barna með árlega 60 þúsund króna greiðslu til allra barna og lækka þannig útgjöld fjölskyldna vegna frístunda. Í stjórnarsáttmálanum er loforð hvað þetta varðar afar loðið og er þar vægt til orða tekið.“