Viktor Orri Valgarðsson stjórnmálafræðingur segir myndir tengadóttur hótelstjóra á Hótel Borgarnesi af atkvæðum sem birtar voru á Instagram vera hrikalegar.
„Ekki að þessi manneskja hafi tekið myndir eða að mér detti í hug að hún hafi ætlað sér að eiga við þessi gögn,“ skrifar Viktor.
Sjá einnig: Ingi segir tengdadótturina ekki hafa brotið af sér
„Heldur vegna þess að þetta sannar með nokkuð óyggjandi hætti að það hefði verið mjög auðvelt fyrir ýmsa aðila að eiga við atkvæðin hafi þeir haft áhuga á því, á meðan kjörstjórnin var í burtu, og það virðist ekki vera nein leið til að ganga úr skugga um nákvæmlega hverjir voru í þeirri stöðu,“ útskýrir Viktor.
Hann tekur fram að hann telji persónulega ekki að það hafi í raun verið átt við atkvæðin.
„En það er algjört lykilatriði að framkvæmd kosninga sé í samræmi við lög og til þess fallinn að það sé hafið yfir allan vafa. Það er bara ekki boðlegt í kosningum í lýðræðisríki að við þurfum að byggja á einhverjum getgátum um það hvort fólk hafi haft nægan áhuga á því að eiga við atkvæði eða ekki.“