Vigdís Hauksdóttir, fyrrverandi borgarfulltrúi Miðflokksins í borginni, var í miklum ham í viðtali við Fréttablaðið í gær um úrslit sveitastjórnarkosninganna.
„Ég náði því markmiði mínu að fella þennan meirihluta og ég er stolt af því,“ sagði Vigdís sem ákvað að láta gott heita ef nokkuð stormasaman tíma í borgarstjórn þar sem hún lét meirihlutann oftar en ekki hafa fyrir sér.
Vigdís gagnrýndi meðal annars Stefán Pálsson, frambjóðanda VG í kosningunum, fyrir að segja að „djöfulgangurinn“ í henni hafi eflaust átt sinn þátt í að fella meirihlutann í borginni.
Vigdís virtist ekki kunna því illa að henni væri þakkað að hafa fellt meirihlutann undir forystu Dags B. Eggertssonar.
„Mér tókst að fella meirihlutann með minni gagnrýni, uppljóstrunum og ábendingum um fjárhagsstöðu borgarinnar og fleira. Ég vil meina að málflutningur minn hafi skilað því að meirihlutinn féll en að kenna mér um að ósamræmi flokkanna hafi ekki verið gert opinbert, það er náttúrlega hlægilegt,“ sagði hún.
Vigdís gagnrýndi svo Þórdísi Lóu Þórhallsdóttur, oddvita Viðreisnar, og sakaði hana um valdagræðgi. Kvaðst hún vera hissa á því að Þórdís og Dóra Björt Einarsdóttir, oddviti Pírata, hafi leyft Degi B. Eggertssyni borgarstjóra að „líma þær tvær á sig“ eins og hún orðaði það.
„Ég held þetta sé valdagræðgi hjá Þórdísi Lóu þegar hún hefði betur viðurkennt ósigur sinn og haldið sér til hlés,“ sagði hún við Fréttablaðið.
Bætti hún við að með þessu herbragði hafi Degi tekist að gera öðrum flokkum erfiðara fyrir hvað varðar myndun nýs meirihluta í borginni.
„Sá meirihluti sem mér myndi hugnast mér best er meirihluti Framsóknarflokks, Sjálfstæðisflokks, Flokks fólksins og Viðreisnar, ef Þórdís Lóa nær að slíta sig frá bandalaginu.“