Víðir Reynisson yfirlögregluþjónn hjá embætti ríkislögreglustjóra segir að fáir þeirra sautján sem greindust með COVID-19 smit á síðasta sólarhring hafi verið í sóttkví.
Þetta sagði Víðir í viðtali við RÚV nú rétt fyrir hádegi. Eins og greint var frá í morgun greindust sautján innanlandssmit síðasta sólarhring sem er það mesta á einum degi síðan í byrjun aprílmánaðar.
Víðir sagði að um væri að ræða tvo hópa, annars vegar fjölskyldutengsl og hins vegar hóp fólks sem kom saman í Vestmannaeyjum um verslunarmannahelgina til að skemmta sér. Sagði Víðir að öll smitin sem komu upp séu meðal íbúa höfuðborgarsvæðisins.
Aðspurður hvort um væri að ræða nýtt hópsmit sagði Víðir að réttast væri að tala um faraldur. „Eigum við ekki bara að kalla það það sem það er? Við erum bara komin í faraldur og Það er bara eins og við sáum í vetur að það eru að koma upp smit hér og þar um allt land.“
Víðir sagði alls óvíst hvort harðari aðgerðir en þegar hefur verið gripið til hefðu getað komið í veg fyrir smitin. Ekkert bendi til þess að brotið hafi verið gegn reglum um samkomubann heldur virðist fólk einfaldlega ekki virða tveggja metra regluna.
Víðir sagði enn fremur að til skoðunar væri að leggja einhverja hinna smituðu inn á sjúkrahús en eins og staðan er núna er enginn þeirra 109 sem eru með virkt smit á sjúkrahúsi.
