„Mér finnst ótrúlega leiðinlegt að verða fyrir rætnu skítkasti og kjaftasögum. Einhverju sem er ósanngjarnt. Það fer illa í mig,“ segir Víðir Reynisson, yfirlögregluþjónn hjá almannavarnarsviði ríkislögreglustjóra, í viðtali við Kjarnann sem birtist um helgina.
Í viðtalinu ræðir Víðir meðal annars um starf sitt sem hefur verið gríðarlega umfangsmikið í COVID-19-faraldrinum. Þá ræðir hann meðal annars um eigin veikindi en hann smitaðist sem kunnugt er af COVID-19 á síðasta ári og veiktist nokkuð mikið.
Eftir því sem liðið hefur á faraldurinn hefur borið á því að samstaðan meðal þjóðarinnar vegna sóttvarnaraðgerða hefur farið þverrandi. Í viðtalinu kemur meðal annars fram að heiftin, sem stundum hefur sést, hafi beinst að honum persónulega.
„Já. Ég er náttúrlega þannig persóna að ég er frekar opinn og gæti jafnvel alveg talist viðkvæmur, eða hvernig sem á að orða það. Ég tek málefnalega gagnrýni ekki nærri mér, finnst hún frábær og nauðsynleg. Hún hjálpar mér að hugsa. En mér finnst ótrúlega leiðinlegt að verða fyrir rætnu skítkasti og kjaftasögum. Einhverju sem er ósanngjarnt. Það fer illa í mig.“
Víðir veiktist sjálfur af COVID-19 í lok nóvember og ákvað hann í kjölfarið að skrifa færslu á Facebook þar sem hann lýsti aðdraganda veikindanna. Í upptalningu sinni á hverjir voru gestkomandi á heimili hans taldi hann einnig upp fólkið sem býr með honum. Tóku margir því þannig að heimili hans hafi verið eins og lestarstöð í miðborg Lundúna þegar raunin var önnur.
„Mig langaði svo að koma hreint fram í öllu. En svona kom þetta út. Og margir misstu sig yfir þessu,“ segir hann meðal annars og bætir við að honum hafi liðið ömurlega yfir að hafa smitast.
„Alveg ömurlega. Þú getur rétt ímyndað þér, að vera búinn að tala um þetta allan þennan tíma, að hvetja fólk til að passa sig og gæta að sóttvörnum, og svo smitast ég sjálfur.“
