Víðir glímir við heila­þoku eftir CO­VID-smitið

16. janúar 2021
18:52
Fréttir & pistlar

Víðir Reynis­son yfir­lög­reglu­þjónn segist allur vera að koma til eftir að smitast af CO­VID-19 í lok nóvember­mánaðar. Víðir veiktist nokkuð hastar­lega og var hann meðal annars sendur í rann­sóknir á Land­spítalann vegna sýkingar í lungum.

Víðir var í við­tali í Bítinu á Bylgjunni í gær­morgun þar sem hann ræddi meðal annars veikindin og eftir­köstin sem margir sem hafa smitast hafa talað um.

„Ég er allur að koma til. Þetta er búið að vera ó­trú­legt ferða­lag. Þrátt fyrir að hafa verið í þessu, talað við fullt af fólki og fylgst vel með hvernig þetta er að fara með fólk þá kom það mér veru­lega á ó­vart hvað þetta tók veru­lega á í mínu til­felli.“

Víðir segir að hann hafi orðið veikari en hann hefur orðið af nokkurri flensu og alls­konar skrýtnir verkir hafi fylgt veikindunum. „Vöðva­verkir, bein­verkir, ég fékk ofsa­kláða í lappirnar og svo fékk ég háan hita sem má segja að séu flensu­ein­kenni, en allt ein­hvern veginn miklu ofsa­fengnara. Svo fæ ég ofan í lungun og er með ein­hvers­konar lungna­bólgu eða sýkingu í lungunum og þennan brjál­æðis­lega hósta,“ segir Víðir sem áður hefur fengið lungna­bólgu en ekki svona svaka­legan hósta eins og hann fékk.

Víðir var í ein­angrun á fjórða viku vegna veikindanna og taldi að hann myndi jafna sig nokkuð fljótt og örugg­lega. Nú þegar tæpir tveir mánuðir eru liðnir síðan hann greindist er hann enn að glíma við eftir­köstin. Hann tekur til dæmis eftir því að honum er mjög naumt skammtað starfs­þrek.

„Þegar líður að seinni partinum verð ég mjög þreyttur,“ sagði hann og bætti við að það skrýtnasta væri að upp­lifa á­kveðna heila­þoku sem er eitt­hvað sem hann hefur ekki upp­lifað áður.

„Ég var allan daginn í gær á Seyðis­firði og var orðinn mjög þreyttur þegar ég kom í bæinn og ég þurfti bara að ein­beita mér á leiðinni heim að keyra bara ekki fram hjá,“ sagði Víðir í við­talinu í gær­morgun og bætti við að hann hafi þurft að minna sjálfan sig á að hann þyrfti bráð­lega að beygja til vinstri eða hægri. „Maður er ekki eins skarpur og maður er vanur,“ sagði hann.

Víðir sagði það vissu­lega hafa verið á­fall að greinast með veiruna og það sé það sjálf­sagt fyrir alla sem veikjast. Hann sagði þó mikil­vægt að hafa í huga að það ætlar sér enginn að veikjast og enginn eigi að skammast sín fyrir að greinast með veiruna.