Víðir Reynisson, yfirlögregluþjónn almannavarnardeildar ríkislögreglustjóra, fór ekki í grafgötur með skoðanir sínar á því að hundrað Íslendingum hafi verið bjargað á ferðalögum af björgunarsveitinni um helgina.
Víðir hefur ítrekað beðið almenning um að ferðast innanhúss en ekki innanlands á næstu vikum. Hefur Páskahátíðin sérstaklega verið nefnd þar til sögunnar, enda gjarnan ein af vinsælli ferðahelgum ársins. Sagði hann meðal annars fyrir helgi að helgin nú gæti verið ágætis æfing.
Ljóst er að ekki allir fóru eftir tilmælum Víðis og nefndi hann það sérstaklega í lok upplýsingafundar almannavarna sem fram fór á sínum stað, klukkan 14:00 í dag.
„Björgunarsveitir björguðu um það bil 100 Íslendingum um helgina. Er þetta ekki komið gott? Eigum við að ekki bara að vera heima? Njótum bara návista við okkar nánustu og verum áfram góð við hvort annað og höldum áfram að vera ábyrg," sagði Víðir.
