Víðir Reynisson yfirlögregluþjónn segist hafa fengið nokkurn fjölda símtala að undanförnu frá fólki sem kvartað hefur undan fyrirkomulagi á fjöldasamkomum þar sem fleiri en 500 manns koma saman.
Við slíkar aðstæður þarf að skipta gestum í hólf og er mjög mikilvægt að engin blöndun sé á milli hólfanna. Tryggja þarf að hvert og eitt hólf sé með sinn inngang og útgang, salerni og þá verða hólfin að hafa sérstaka miða- og veitingasölu svo eitthvað sé nefnt.
Á upplýsingafundi almannavarna í dag sagði Víðir að víða væri pottur hvað þetta varðar, að minnsta kosti ef marka mætti ábendingar sem hann hefur fengið.
„Þetta er auðvitað sett í sóttvarnarskyni og það gengur þvert á tilgang fjöldatakmarkana að hafa 500 manna hólf ef þau geta blandast fram og til baka eins og fólki sýnist,“ sagði Víðir á fundinum um leið og hann hvatti landsmenn til að sýna ábyrgð.
„Þetta mun auðvitað ekkert virka ef við sýnum ekki ábyrgð. Skipuleggjendur viðburða þurfa að sýna ábyrgð með því að bjóða upp á skipulag sem samræmist þessum leiðbeiningum. En við öll sem mætum á staðinn, við þurfum líka að sýna ábyrgð,“ sagði Víðir sem rifjaði upp símtöl frá fólki undanfarna daga þar sem honum hefur verið bent á þetta.
„Og ég hef spurt viðkomandi: Hvað gerðirðu? Fórstu þá ekki bara í burtu? „Nei ég þvældist á milli hólfanna.“ Það er náttúrlega alveg glatað að þykjast vera að sýna ábyrgð með því að vera að kvarta yfir þessu og sýna svo ekki neina ábyrgð á staðnum. Það getur enginn gert þetta fyrir okkur. Við verðum að gera þetta saman og það þurfa allir að taka þátt í þessu.“