Eitt af því sem er hvað varasamast á næstu vikum er að staða faraldurs COVID-19 og viðbrögð við honum verði að miklu kosningamáli í Alþingiskosningunum í haust. Þetta segir Jóhannes Þór Skúlason, framkvæmdastjóri Samtaka ferðaþjónustunnar í færslu á Facebook.
„Kosningar til Alþingis eiga að - verða að - snúast um það hvernig flokkarnir ætla að tækla efnahagsmál og samfélagsmál á næsta kjörtímabili. Ekki um það hvort farið hafi verið nákvæmlega eftir tillögum í minnisblöðum sóttvarnarlæknis eða hvernig bólusetningáætlun hafi gengið eða fleira í þeim dúr,“ segir Jóhannes.
Hann segir stjórnmálaflokkana þurfa að setja fram sýn á framtíðina, á endurreisn efnahagslífsins, atvinnulífs og samfélags upp úr kreppuástandi, hvernig þeir sjá fyrir sér að ná samfélaginu upp úr þessum skurði sem COVID hefur grafið undanfarin ár.
„Hvernig hyggjast þeir takmarka samfélagslegan kostnað eftir kreppuna, tryggja lífskjör til framtíðar og leiða þjóðina í átt að meiri almennri velsæld? Og svo þurfum við að sjá fulltrúa þeirra takast á um stefnurnar, heyra rök og gagnrök fyrir mismunandi sýn flokkana á þessi málefni. Á því byggjast lýðræðislegar kosningar,“ segir Jóhannes.
„Við höfum séð það í öðrum löndum undanfarna mánuði hvað gerist þegar faraldurinn er gerður að kosningamáli. Það þvælist bara fyrir umræðunni sem þarf að fara fram um framtíðarsýn fyrir samfélagið. Ég vona innilega að fólki í stjórnmálum og fjölmiðlum lánist að forðast slíkar keldur á næstu vikum.“
