Helgi Jóhannesson lögfræðingur veiktist af kórónuveirunni fyrir þremur vikum. Hann var útskrifaður síðustu helgi. Í samtali við Vísi biður hann fólk um að fara varlega, reyna með öllum ráðum að komast hjá því að sýkjast af veirunni. Þá segir hann að þeir sem veikjast ættu að hafa í huga að baraferlið sé langt. Hann segir við Vísi að þrátt fyrir að hafa útskrifast sé töluvert í það að hann nái fullri heilsu.
„Ég var alveg hálfan mánuð hundveikur og núna er ég búinn að vera í viku á hálfu gasi,“ sagði Helgi í Bítinu í morgun og bætti við að hann væri mjög brothættur eftir veikindin.
„Því manni slær niður og fær kannski hita bara af því að gera eitthvað örlítið.“ Sjálfur fór Helgi í stuttan göngutúr eftir að hafa verið útskrifaður og við það hafi honum slegið niður. Smári McCarthy þingmaður Pírata sem einnig veiktist af veirunni en var þó einkennalítill tekur undir með Helga. Smári segir á Facebook að hann hlakki til að komast út úr húsi og fara í göngutúr á öðrum stað en í stofunni.
„Tek undir með Helga hér. Ég geri ráð fyrir að útskrifast á morgun, en er í rauninni enn frekar slappur á ýmsa vegu þótt ég sé einkennalaus. Þótt ég hafi sloppið við verstu einkennin eru lungun í mér ekki alveg í besta standi eftir þetta.“
